Novitads

Novs documentalists

Novs documentalists per l’Institut dal DRG

La Societad Retorumantscha ha occupà da nov il post da documentaziun. La suprastanza ha elegì Andri Casanova per in pensum da 30% e Manfred Veraguth per 40%.
 Lic. theol. Andri Casanova lavura gia differents onns sco forza auxiliara en l’Institut dal DRG e surpiglia per il 1. da favrer sia part dal documentariat sco plazza regulara. Dr. fil. Manfred Veraguth, emploià parzialmain tar l’Archiv da la citad da Cuira, cumenza sia plazza en il decurs dal favrer da quest onn.

Andri Casanova, creschì si a Vrin, ha fatg il studi da teologia ed è activ sco assistent en la Scol’auta da teologia a Cuira, nua ch’el scriva era sia dissertaziun. Manfred Veraguth, sesent a Sagogn, ha absolvì ses studis a Berna e dispona dad ina vasta experientscha professiunala che al qualifitgescha a moda ideala per il documentariat en l’Institut dal DRG. El resta redactur da las Annalas, ch’el ha surpiglià l’onn passà, era suenter esser elegì sco documentalist.

Tar il pensum dals documentalists tutgan il sustegn da la redacziun, la tgira da la fototeca e da dar infurmaziuns en dumondas che vegnan da persunas interessadas per lingua e cultura rumantscha.

lic. teol. Andri Casanova

dr. fil. Manfred Veraguth