Institut

NOSSA FOTOTECA

L’ospizi dals chaputschins a Salouf(Fotografia: W. Zeller)

Novitads

Kuno Widmer va en pensiun

Suenter avair lavurà 35 onns cun in pensum da 100% en l’Institut dal DRG a Cuira va Kuno Widmer (65) da Gränichen e sesent a Sargans en pensiun la fin da schaner 2015. El ha entschet ses engaschament en l’Institut dal DRG sco documentalist ils 14 d’avrigl 1980, ina plazza ch’ins aveva stgaffì da quel temp da nov. Sco documentalist ha Kuno Widmer tgirà la biblioteca, las cartotecas ed ulteriuras collecziuns da material da l’Institut dal DRG e plinavant preparà stgatlas per la redacziun dal vocabulari naziunal dal rumantsch, il Dicziunari Rumantsch Grischun (DRG), enfin la fin da l’onn 1990. L’onn 1989 ha el redigì ils chavazzins inclemenza – increschantüna dal DRG e l’atun 1990 ha la suprastanza da la Societad Retorumantscha elegì Kuno Widmer sco redactur dal DRG a partir dal 1. da schaner 1991. Da sia plima deriva ina gronda retscha d’artitgels en ils toms 8 fin 14 dal Dicziunari Rumantsch Grischun, numerus da quels zunt pretensius, saja quai pertutgant la chaussa, la semantica u il diever grammatical dal pled. Plinavant ha Kuno Widmer endatà ils onns 2004–2015 en ina banca da datas ina gronda part dal questiunari Melcher/Pult, la pli impurtanta funtauna per il material oral dal Dicziunari Rumantsch Grischun. Durant ses temp en l’Institut dal DRG ha el era respundì a numerusas dumondas a l’institut pertutgant la lingua rumantscha, la cultura rumantscha ed alpina e l’origin da singuls pleds rumantschs, nums locals e schlattainas. Cordial engraziament a Kuno Widmer per ses grond engaschi en favur da l’Institut dal DRG durant blers onns ed in bel temp da pensiun.

enavos