La fin d’avust 2021 è cumparì il fascichel dubel 195/196 cun la seria da pleds da MIRAR I fin MISTER I.

Quest fascichel cuntinuescha cun l’artitgel MIRAR I, sa deditgond lura a differentas noziuns da la flora e la fauna: la chaglia da MIRTA (duvrada per far tschupels) u la MISAROCLA (che na penda betg mo vi da la chapitscha, mabain po era denominar pastgs e flurs). Plinavant suondan MISAROGN I, MISAROGN II e la MISCALCA: l’emprim è la mieur ‘Spitzmaus’, il segund è l’erva miseron/maioran ed il terz èn las miscalcas/las puschas, savens era duvradas sco animals da termagls.

En il rest dal fascichel èsi lura finì cun flurs ed i cuntinuescha cun ina seria vaira religiusa(-catolica): davent dal MISERERE, sur la MISERICORDIA ed il MISSALE, fin il MISSIUNARI II. Qua intervegn ins ch’igl è vegni stgaffì a Camuns en Lumnezia l’onn 1698 in’atgna missiun cun ina nova baselgia, perquai che la pastoraziun da Cumbel anora era stentusa durant l’enviern. U ch’ins legia – Porca MISERIA! – ch’ina tarmenta schimgia haja engulà il gibus dad ina missiun.

Tranteren cumparan artitgels pli «moderns» sco la MISS. Las victuras da las concurrenzas da bellezza en Rumantschia èn dentant surtut vatgas u chauras. Però la vatga che dat il pli bler latg n’è betg la ‘Miss latg’, mabain la MISERIERA. Ed avant che tut questas vatgas giajan ad alp, van ellas per il pli si MISES, speranza senza survegnir MISLADAs cun la MISLA. Pertge attenziun! Forsa fissi tranter las vatgas er ina MISSUIA? En Surses, spezialmain a Tinizong, devi quella sort da strias missuias che sa midavan en animals … E forsa las datti anc adina, tgi sa?

Il nov fascichel pudais Vus retrair en nossa butia online.