Il settember 2022 è cumparì il fascichel dubel numer 197/198 dal DRG cun la seria da pleds da MISTER I fin MOC I.

Quest fascichel cuntinuescha cun l’artitgel MISTER I, cumenzà en il fascichel precedent. Gea, era quel «mister» englais fa part dal stgazi da pleds rumantsch! Nus savain la finala: la Rumantschia ha Misters e Miss en mantuns, surtut en l’allevament da muvel, quai n’è nagin misteri. Ed il MISTERI è lura er in dals proxims artitgels en la seria da pleds dal fascichel 197/198: Ch’in «misteri» po esser «insatge ch’ins na dastga betg tradir», chapin nus. Ma sch’insatgi discurra dals «Misteris dal Rusari», lura po quai tunar vaira MISTERIUS e nunchapibel. Tgi sa anc tge che quai è – maindir enumerar ils quindesch misteris? Tschintg misteris da letezza, tschintg misteris da tristezza, e tschintg misteris da gloria. Voilà. Quai n’è nagin MISTREGN. Na, in mistregn en il senn da professiun n’èsi betg. Però in pau in «kunst» è er il mistregn. Surtut dovri in pau «kunst» da tegnair a mastrin (in’autra furma e muntada dal MISTREGN!), sch’ins vul dumagnar ils MITFRESSERs, sco ils comeduns vegnan numnads a Domat. Ins als pudess gea numnar «mangiacuns», vulend far la parallela al num tudestg «Mitesser» che è ina translaziun dal latin comedo (com ‘cun’ + edo ‘jau mangel’). Gea, trids èni, ubain «macorts», per arrivar al proxim pled da la seria: MITGIERT. Quest pled munta en il vair senn dal pled tant sco «mal + correct». In diever correct è recumandà tant tar la MITRA sco tar la MITRAGLIA, uschiglio èn ins forsa svelt in MITUS. Avant che arrivar al MIZGUOGL che tracta las pli differentas significaziuns da «magugl» davent da l’intern da l’ossa e da las plantas fin a la pasta da chaschiel, datti anc in MIXTUM COMPOSITUM da divers MIXs e MIXTURAs. Suenter la mesadad dal fascichel daventi pli patgific, pudend s’occupar da MOBELs e MOBIGLIAs, per lura MOBILISAR anc ina giada las ultimas forzas da leger fin l’artitgel MOC – speranza senza stuair cridar moc e larmas.

Il nov fascichel pudais Vus retrair en nossa butia online.