Il november 2023 è cumparì il fascichel dubel numer 199/200 dal DRG cun la seria da pleds da MOC I fin MOGUL.

Quest fascichel cuntinuescha cun l’artitgel MOC che tracta differentas secreziuns da mucosa. Silsuenter vegn il MÖD cun in dals prominents «möds» en la litteratura rumantscha. L’onn 1560 motivescha Jachiam Bifrun sia translaziun dal Nov Testament en puter suandantamain: «Vair’ es che alchiüns oters s’intramettan da scriuer nos plêd, cun ün schert moed, quęl chi num plęstha (es stimmt, dass einige andere unsere [romanische] Sprache zu schreiben versuchen, in einer gewissen Art, die mir nicht gefällt).

Betg ina moda e maniera da scriver, mabain ina estetica vegn tractada en l’artitgel MODA. La Gasetta Romontscha crititgescha l’onn 1916 la moda feminina en temps da guerra: «In’ordra … appellescha tier las femnas tudestgas, de en interess dils basegns per l’armada vuler renunziar sin la moda nova, che prevedi ussa schubas largias plein fauldas e calzers malnizeivlamein aults. Cheutras vegni sfarlatau bia memi bia materia e curom, che survessi per pli impurtonts intents.»

La moda vegn preschentada da models, ma in model è dapli che in mannequin. Uschia sa preschenta en ils artitgels davart il MODEL in vast spectrum da «models»: numnadamain dal model ‘Buttermödeli‘ fin al fotomodel modern. Cun furmas modernas da l’art han poets e gasettas rumantschas gì plitost fadia; quai resorta almain da la seria da pleds MODERN fin MODERNISSEM. Main moderna è la tradiziun enturn il son Mudest. L’artitgel MODEST (PN.) illustrescha ils differents usits, rituals e las locuziuns che stattan en connex cun la festa da son Mudest, surtut quella a Sumvitg. Sco las tradiziuns, han era leschas subì modificaziuns en il decurs dal temp. Era sch’il verb MODIFICHAR tuna pauc particular, frunt’ins en quest artitgel dal DRG tuttina anc sin citats interessants sco p.ex. quel or dals Statuts civils da Sur Tasna dal 1806. Quels permettan, suenter ina modificaziun, tut in’autra vita a persunas gia daditg maridadas: «Mari et mugleir dessan chiasar et habitar insembel … 1804 fuo modifichia chia passa anns 60 s’possa eir chiasar seperadamaing» (Mann und Frau sollen zusammen wohnen. 1804 wurde [dieser Artikel] so abgeändert, dass man bei einem Alter von über 60 Jahren auch getrennt wohnen kann).

Suenter ina gruppa da pleds deditgada a tut quai che è bletsch e lom (numnadamain ils pleds MÖGL per ‘bletsch, umid; aura da plievgia’, MÖGLIA ‘buglia’ e MÖGLIAS ‘plievgia’, MÖGLIAR ‘lomiar’, MÖGLIERVI ‘umid, cun secreziun da mucosa’) vegn anc dà ina giada cun il MOGN en furma dad in detg artitgel che mussa: in mogn n’è betg simplamain in mogn. E tgi sa, forsa ch’ins dovra in tgau sc’in mogn, qvd. esser ina persuna testarda, per daventar in MOGUL? Ma per avair ils detagls da quest artitgel èsi da spetgar fin il proxim fascichel, nua che quest pled e l’entir alfabet cuntinuescha sia via.

Il nov fascichel pudais Vus retrair en nossa butia online.