A New York vegnan discurridas 800 linguas, ina da quellas è er il rumantsch. Il linguist Dan Kaufman vul registrar tut questas linguas, tranter auter era cun agid da la Grischuna en exil, Amalia Malchiodi (86), oriunda da la Surselva. L’onn passà èn ella e ses figl Giancarlo stads sin visita en Grischun tar lur ragischs linguisticas (tranter auter han els era fatg ina visita en l’Institut dal DRG). Tenor l’UNESCO vegn la mesadad da las 6500 linguas existentas ad esser svanidas la fin dal 21avel tschentaner. Cun mintga lingua svanescha era mintgamai ina moda unica da vesair il mund. Dapli da Giancarlo Malchiodi a la tschertga da sia lingua materna datti da vesair en il film CIAO BABYLON che vegn mussà sonda, ils 2 da december, a las 20.15 a Glion en il Cinema sil Plaz. Ulteriuras infurmaziuns: www.ciaobabylon.ch, reservaziuns qua ubain sur www.cinemasilplaz.ch. Ils reschissurs dal film Kurt Reinhard e Christoph Schreiber vegnan er ad esser preschents.