Pensais vus che las perscrutadras ed ils perscrutaders da las scienzas umanas e socialas sfeglian l’entir stendì e benedì di be cudeschs sitgs? Patratga! Sut quest motto envida l’Academia Svizra da las scienzas umanas e socialas (ASSU) da festivar ses 75avel anniversari.

Scuvri sin la plazza da la staziun a Berna las pli passiunantas dumondas da la perscrutaziun sociala ed umana. Tranter ils 12 stans pudais discurrer cun in criminolog, exercitar voss talents da calligrafia e testar voss sensori diplomatic en in gieu. U che vus pudais demonstrar vossa savida: Tge savais vus da l’antiquitad? Quant bain enconuschais vus ils dialects svizzers?

En la Chasa da las generaziuns vegnan ils giasts divertids cun in ritg menu da saut, teater e musica, cundì da pleds festivs. Vus pudais far voss emprims pass da Salsa Cubana u perfin far la reschia dal teater improvisà. Cura ch’il tgau fima ed il venter sgarguglia, chattais als food-trucks ed a la bar il remedi per dustar fom e said.

La ASSU è promotura dals quatter Vocabularis naziunals. Sa chapescha che er il DRG e ses collegas vocabularis èn da la partida a la festa: al stan nr. 7 cun la «racolta da pleds».

Sonda, ils 17 da settember 2022 a partir da las 14.30 a Berna a la plazza da la staziun ed en la curt da la Chasa da las generaziuns. Per tut las persunas interessadas ad art, istorgia, cultura e politica e che vulan simplamain far festa. Il program: www.sagw.ch/denkste