Dacurt ha la cumissiun da recrutaziun da la Societad Retorumantscha elegì Angelica Blumenthal da Degen/Lumnezia (*1990) sco assistenta scientifica en la redacziun dal Dicziunari Rumantsch Grischun (DRG). Suenter la matura ha ella studegià linguistica cumparativa romana ed istorgia d’art a l’Universitad da Turitg e linguistica generala a l’Universitad da Vienna. Ella entschaiva sia nova incumbensa il 1. da favrer 2023. En l’Institut dal DRG lavura ella gia dapi il settember 2018 sco forza auxiliara respectivamain sco praticanta. Cun sia elecziun serra la Societad Retorumantscha la largia che sa dat en la squadra da redacziun dal DRG suenter il pensiunament da Carli Tomaschett la fin da favrer 2023.
