Las Annalas da la Societad Retorumantscha van tranter la glieud! Da nov organisescha la Societad Retorumantscha (SRR) in’occurrenza publica per mintgamai preschentar il numer actual da las Annalas da la SRR. Tut las persunas interessadas èn envidadas a la vernissascha cun referats, discussiuns e musica. Quest onn ha lieu la vernissascha ils 11 d’october 2024 en La Fermata a Falera. 

Il program cumenza cun in bainvegni da la presidenta da la SRR, Corina Casanova, e cun la preschentaziun da las Annalas 137 entras las duas redacturas Barbara Cuffaro e Giuanna Caviezel. Silsuenter dattan Alina Müller e Martin Cantieni invista en lur artitgels davart las tematicas «Pertge emprendan persunas creschidas rumantsch? Davart la relevanza da la motivaziun integrativa e da la motivaziun instrumentala» ed «Exageraziuns e largias en il rapport da viadi Trentaschunc onns en l’America da Ludivic Cathomen». Il program vegn cumplettà cun in concert da Pascal Gamboni e finescha cun in aperitiv en buna cumpagnia.

Era quest onn cuntegna l’annuari scientific puspè ina dunsaina da contribuziuns da tut gener: reediziuns da texts rumantschs pli vegls, perscrutaziuns ed analisas litteraras, studis sociolinguistics ed istorics-culturals, recensiuns e necrologs.

Vernissascha: Venderdi, 11 d’october 2024, 18:30 a Falera en La Fermata

Il cudesch pon ins cumprar direct al lieu ubain en nossa butia online.