Cun ina presidenta en il futur - L’Institut dal Dicziunari Rumantsch Grischun – curt l’IDRG

Novitads

NOSSA FOTOTECA

Naz sper Preda cun il Piz Ela(Fotografia: C. Meisser)

Novitads

Cun ina presidenta en il futur

Radunanza annuala da la Societad Retorumantscha

Per l’emprima giada en sia istorgia vegn la Societad Retorumantscha presidiada d’ina dunna. La radunanza annuala ha elegì Corina Casanova sco successura da Cristian Collenberg ch’è stà passa 20 onns en uffizi.

Suenter in onn senza inscunters pervia da la pandemia èn commembras e commembers da la Societad Retorumantscha (SRR) s’entupads la saira dals 28 d’october 2021 en il Hotel Chur a Cuira per lur radunanza annuala. Igl è stà ina radunanza speziala en l’istorgia da passa 135 onns da la societad, gea ina istorica: Per l’emprima giada è vegnida elegida ina dunna sco parsura da la SRR. Cunquai ch’il president Cristian Collenberg aveva remess ses uffizi, hai gì num da chattar in successur. Cun la giurista Corina Casanova ch’è tranter auter stada chanceliera federala dal 2008 fin il 2015 han ins pudì preschentar ina successura «da num e da pum», sco quai ch’igl è vegnì menziunà. Casanova è vegnida elegida unanimamain e cun applaus. Il president partent ha punctuà ch’i saja ina satisfacziun speziala da pudair surdar la batgetta ad ina dunna.

Nov president d’onur
Collenberg sez n’è betg vegnì relaschà da ses uffizi senza vegnir onurà. Quai cun buna raschun: Betg main che 39 onns è el s’engaschà a favur da la societad. Cristian Collenberg è daventà suprastant da la SRR l’onn 1982 cun surprender la redacziun da las Annalas da la Societad Retorumantscha. Questa incarica ha el ademplì fin l’onn 1990, el è silsuenter restà en suprastanza. L’onn 1999 ha el alura surprendì il presidi da la societad ed ha dirigì quella durant passa 20 onns. En quests dus decennis passads ha la SRR stuì prender a maun la sfida da preparar ses project principal, l’ediziun dal Dicziunari Rumantsch Grischun entras l’Institut dal DRG, per il mund digitalisà. Per ses merits è Collenberg vegnì elegì cun applaus sco president d’onur da la societad.

La nova presidenta da la SRR, Corina Casanova, ed il nov president d’onur da la societad, Cristian Collenberg.
(Foto: DRG, U. Lutz)

Quint ed ulteriuras elecziuns
Corina Casanova surprenda il timun da la societad l’entschatta da l’onn 2022. Ella po far quai senza gronds quitads finanzials. Grazia al sustegn da l’Academia svizra da scienzas umanas e socialas (ASSUS) e dal Chantun Grischun è la finanziaziun da l’Institut dal DRG segirada. Uschia ha il cassier Roman Sgier pudì preschentar in quint da la societad equilibrà, quest onn schizunt cun in pitschen surpli d’entradas. Er il preventiv per il 2022 na prevesa betg in grond deficit.

Sco quai ch’il president partent Cristian Collenberg ha fatg a savair spetgian intginas incumbensas per l’avegnir, uschia ina restructuraziun eventuala da la societad. Quai surlascha Collenberg dentant a sia successura. Lezza po quintar cun il sustegn da la suprastanza da la SRR ch’è medemamain vegnida elegida da la radunanza annuala e che sa cumpona da Chasper Pult, Roman Sgier, Dumenic Andry, Martín Camenisch, Gian Marco Beeli, Uorschla Natalia Caprez Brülhart, Barbara Cuffaro e Bettina Berther. Las duas ultimas furman il nov tandem da redacziun da las Annalas.

Corina Casanova ha ditg ch’ella sa legria da la nova sfida. Cunquai ch’ella è creschida si biling cun ils dus idioms sursilvan e vallader para ella predestinada da presidiar questa societad interrumantscha. Suenter otg presidents vegn ella sco emprema presidenta en mintga cas a dar ina nova tempra a la SRR.

Referat d’Andri Casanova: Il mund ebraic da la «Bibla ecumena romontscha»
Suenter la radunanza annuala da la Societad Retorumantscha han preschentas e preschents pudì assister ad in referat public, quai sco usità dapi blers onns. Quest onn ha Andri Casanova, teolog e documentalist tar l’Institut dal Dicziunari Rumantsch Grischun, referì davart il mund ebraic da la «Bibla ecumena romontscha». Sco ina da quatter persunas che furman la gruppa da translaziun da la «Bibla ecumena romontscha» ha el pudì dar in’invista en questa lavur pretensiusa. Co translatesch’ins texts ebraics en sursilvan actual? Questa sfida ha Casanova explitgà cun exempels concrets da la lingua ebraica ed ha dà invista en in mund nunenconuschent per ils blers dals preschents. Ebraic n’è betg ina lingua indogermana, e ch’ins legia da dretg a sanester para per tals che n’enconuschan betg questa lingua il pli pitschen problem. Casanova ha dentant dà l’impressiun ch’i n’è betg sulettamain ina sfida da transponer ina lingua da circa 3'000 onns en in rumantsch actual, mabain er ina fascinaziun. Ed el ha mess en vista ch’il quart tom da la «Bibla ecumena romontscha», ils cudeschs da lescha, vegnia a cumparair l’onn 2022.