Il gieu da Joseph d’Egipta, scrit da Gian Travers, è l’emprim gieu rumantsch preschentà il 1534 a Zuoz, sco quai che ses contemporan in pau pli giuven, Durich Chiampell, raquinta en sia Historia Raetica. Entant che l’emprima ovra da Gian Travers, che tracta la guerra dal chastè da Müs dal 1526, è sa mantegnida en manuscrits pir a partir dal 1639, datti dal Joseph betg main che quatter manuscrits pli vegls, plinavant anc trais pli giuvens.
In da quests manuscrits datescha gia dal 1567, damai mo da quatter onns suenter la mort da l’autur. El va pia fitg probabel enavos direct sin l’original e stat segir fitg datiers da quel. Quest manuscrit cuntegna effectivamain bleras scripziuns ch’ins chatta bain er sporadicamain en auters texts, ma betg en in dumber uschè grond. El è damai in impurtant document da la scripziun da Suot Funtauna Merla ch’era da quel temp anc vaira differenta da la scripziun da Jachiam Bifrun da Samedan.
L’ediziun dat en emprima lingia il text dal manuscrit dal 1567. Cunquai che betg tut ils fegls da quel èn sa mantegnids, vegn il text cumplettà dal segundvegl manuscrit dal 1593 per ils vers che mancan. Variantas dals auters tschintg manuscrits independents vegnan inditgadas en las annotaziuns, sch’i na sa tracta betg mo da variantas ortograficas. Difficultads d’ediziun e d’interpretaziun vegnan tractadas en in commentari, ed in glossari cumplet duai facilitar la chapientscha dal text.
