Gievgia saira, ils 23 da matg ha la Societad Retorumantscha (SRR) salvà sia radunanza annuala. Suenter la part statutarica ha la presidenta Corina Casanova undrà ils merits dal vicepresident partent Chasper Pult ed al ha engrazià per ses engaschi a favur da la SRR e da la scienza rumantscha sco suprastant da la SRR dapi il 1983 e sco vicepresident dapi il 2004. Da nov en suprastanza ha la radunanza elegì Giuanna Caviezel (creschida si a Vrin) e Ralf Beer (creschì si a Schluein) per ils posts vacants. Giuanna Caviezel maina ultra da quai ensemen cun Barbara Cuffaro Strebel la redacziun da las Annalas, l’annuari da la SRR cun tractats davart la lingua e la cultura rumantscha.

En il referat public suenter la radunanza ha Georges Darms preschentà l’ovra «Gian Travers: La histoargia da Joseph», cumparida en la retscha scientifica Romanica Rætica da la SRR. I sa tracta qua dal pli vegl teater rumantsch, preschentà il 1534 a Zuoz. Georges Darms ha publitgà l’onn passà in’ediziun commentada tenor ils manuscrits da quel teater.