Gievgia, ils 23 da matg 2024 a las 20:15 ha lieu a Cuira en il restaurant Va Bene in referat public dal professer emerità Georges Darms. L’onn passà ha el publitgà en la retscha da la Romanica Rætica il titel «Gian Travers: La histoargia da Joseph» – in’ediziun commentada tenor ils manuscrits da l’emprim teater rumantsch, preschentà il 1534 a Zuoz. En il referat vegn Georges Darms a dar in’invista en sia lavur da retschertga e d’ediziun. Il linguist e redactur dal DRG Michele Luigi Badilatti vegn a far in’introducziun e manar tras la discussiun suenter il referat.

Il referat è public e per rumantsch, giasts èn cordialmain bainvegnids. Il referat succeda a la radunanza annuala da la Societad Retorumantscha (SRR), l’uniun purtadra da l’Institut dal DRG. Suenter il referat porscha la SRR in aperitiv.

«Gian Travers: La histoargia da Joseph». Referat da Georges Darms. Gievgia, 23 da matg  2024, 20.15 en il restaurant Va Bene, Gäuggelistrasse 60, Cuira