Davart romantica, retschertgas e rumpatestas

La Societad Retorumantscha envida ad ina sairada cun musica da Martina Linn e referats curts davart la lingua rumantscha. 

Co pudess ina persuna sursilvana chapir il pled «scarafag»? Co chattar ora dapli da quest pled? Co influenzeschan ils uffants la lingua da lur geniturs?  – Quai e dapli sa dumondan Giuanna Caviezel, Ralf Beer ed Ursin Lutz venderdi saira, ils 2 da matg, a chaschun dad ina sairada rumantscha organisada da la Societad Retorumantscha. En furma da referats curts dattan els in’invista en particularitads da la lingua rumantscha, en projects da retschertga ed en las activitads da la Societad Retorumantscha che edescha tranter auter il Dicziunari Rumantsch Grischun. Cumplettads vegnan lur referats da las chanzuns da l’Engiadinaisa Martina Linn. 

Data e lieu:  venderdi, ils 2 da matg, a las 20:15 a Cuira en la Sala Muntanella da la Chasa RTR (Via da Masans 2).


Tut las persunas che s’interesseschan per la lingua rumantscha, che vulan giudair ina saira cun musica, cuntegn e divertiment u che vulan giudair ina baterlada durant in aperitiv èn cordialmain envidadas. L’entrada è libra.

Avant quest program ha lieu a partir da las 18:30, medemamain en la Sala Muntanella, la radunanza annuala da la Societad Retorumantscha, presidiada da Corina Casanova. Ina tractanda impurtanta furma tranter auter la nova via che la Societad vul enchaminar. Tgi che vul savair dapli davart las activitads da la Societad Retorumantscha – quellas actualas e quellas futuras – è cordialmain envidà da vegnir a la radunanza sco giast.

Ulteriuras infurmaziuns dal program suondan era sin instagram u facebook.