Carli Tomaschett va en pensiun

La fin da favrer ha il chauredactur terminà sia lavur tar l’Institut dal DRG

Suenter bunamain 40 onns a l’Institut dal Dicziunari Rumantsch Grischun (IDRG) ha Carli Tomaschett fatg urden en ses biro en la Ringstrasse 34 a Cuira. Cun 65 onns è el ì en pensiun ed el ha surdà la bitgetta en mauns pli giuvens. Per l’IDRG munta sia pensiun in term marcant e la fin d’ina èra fritgaivla. Carli Tomaschett vegn a mancar en l’institut.

Dal collavuratur scientific al chauredactur

Carli Tomaschett da Trun ha entschiet sia carriera a l’IDRG il december da l’onn 1985: Suenter la matura al gimnasi da la claustra da Mustér ed in studi a l’Universitad da Fribourg era il giuven romanist vegnì engaschà sco collavuratur scientific. Dapi lu è el stà ina forza fidaivla per l’institut. En ses emprims onns a l’IDRG ha Tomaschett terminà sia dissertaziun, sco quai ch’igl era vegnì pretendì da ses patrun. Sia lavur «Die Orts- und Flurnamen der Gemeinde Trun. Mit einem siedlungsgeschichtlichen Überblick», publitgada l’onn 1991 en la retscha Romanica Raetica, è stada il fritg d’ina lavur scientifica fundada ed exacta che vala oz sco exemplarica areguard lavurs sin il champ da la toponomastica. Che quest cudisch è exausts dat plinavant perdetga da la buna accoglientscha betg sulet en il ravugl scientific, mabain en general. Ils 3 da matg 1991 è Carli Tomaschett vegnì tschernì sco redactur dal DRG. Suenter la demissiun da Felix Giger sco chauredactur sin la fin da l’onn 2003 è ses substitut Carli Tomaschett vegnì elegì sco nov manader da l’IDRG. Era quai uffizi ha el ademplì conscienziusamain e minuziusamain durant bunamain 20 onns.

Redactur luvrus

L’oraifra lavur da Carli Tomaschett as lascha quantifitgar per part. Per il DRG ha el scrit betg main che 904 artitgels curts, lungs e pretensius, dal lemma IMPEDRIR fin al lemma MISTRAR. Oravant tut artitgels sco IRAL ni METTER, per numnar be dus, han pretendì ina vasta savida, da far retschertgas fundadas e da lavurar precis  – qualitads da Carli Tomaschett. Sut sia egida èn cumparids passa 45 fascichels, ils numers 151 fin 198. Quai munta en media in fascichel dubel ad onn. Che la lavur prestada en l’IDRG saja vesaivla en furma dal product stampà è stà da gronda muntada per Carli Tomaschett, almain in fascichel ad onn ha el adina vulì publitgar. Grazia a quella perseveranza ha il chauredactur Carli Tomaschett pudì realisar quatter dals 14 volums ch’il DRG cumpiglia actualmain.

Manader conscienzius

Sco chauredactur n’è Carli Tomaschett betg sulettamain stà responsabel per l’ediziun dal DRG, mabain il medem mument era per l’andament da l’institut. Questa lavur n’ha el betg fatg main conscienziusamain che la lavur da redactur, bain savend che la lavur administrativa n’è forsa betg uschè fascinanta sco la lavur da redeger, dentant d’impurtanza vitala. Durant quels bunamain 20 onns sco mainagestiun ha Carli Tomaschett – che aveva cumenzà a lavurar senza computer – oravant tut stuì tegnair quint dal svilup tecnic en tut ils secturs da lavur e guardar che l’institut saja à jour cun las pussaivladads digitalas. Betg il davos la moda e maniera da metter il DRG en la rait ha mussà che l’institut ha era en quest sectur fatg lavur exemplarica. Insumma è il futur dal DRG adina stà a cor a Carli Tomaschett, uschia ch’el ha gì in egl avert per forzas giuvnas. Igl è reussì da chattar interessentas ed interessents per questa lavur pretensiusa e da scolar e formar ina squadra da redacturas e redacturs promta per las proximas sfidas. I ha legrà el fetg che ses substitut Ursin Lutz è vegnì elegì sco ses successur e che la squadra che redegia uss il DRG è giuvna, numnadamain tranter 32 e 41 onns.

La Societad Retorumantscha engrazia

La curta survista dat perditga da la gronda lavur prestada da Carli Tomaschett en favur da l’IDRG – ed uschia era en favur da la Societad Retorumantscha (SRR), l’uniun purtadra da l’Institut dal DRG. Lezza engrazia cordialmain a ses chauredactur partent ch’è stà ina pitga fidaivla da l’institut. La SRR giavischa a Carli ina pensiun plain cuntentientscha che porscha plaz per ses hobis. Cumià uffizial da Carli Tomaschett prenda la suprastanza da la SRR en sia sesida da suprastanza dals 31 da mars, l’entira societad a chaschun da la radunanza annuala dals 12 da matg 2023.