Elecziun d’in nov chauredactur e mainagestiun - L’Institut dal Dicziunari Rumantsch Grischun – curt l’IDRG

Novitads

NOSSA FOTOTECA

Il Bogn da Peiden l’entschatta dal 20avel tschientaner(Fotografia: C. Meisser)

Novitads

Elecziun d’in nov chauredactur e mainagestiun

Nov chauredactur e mainagestiun per l’Institut dal Dicziunari Rumantsch Grischun

A la sesida dals 2 da november 2022 ha la suprastanza da la Societad Retorumantscha elegì Ursin Lutz da Domat nov chauredactur e mainagestiun da l’Institut dal Dicziunari Rumantsch Grischun (IDRG), quai sin proposta da la cumissiun da recrutaziun.
Ursin Lutz ch’ha 41 onns è creschì si a Rabius. Suenter la matura a la Scola claustrala da Mustér ha el studegià romanistica ed anglistica a l’Universitad da Friburg, nua ch’el ha fatg il doctorat l’onn 2015. Dapi 2006 è el engaschà tar l’Institut dal Dicziunari Rumantsch Grischun en differentas funcziuns. Sper sias vastas activitads scientificas ha Ursin Lutz manà cun success plirs projects gronds, oravant tut en il champ da l’informatica, uschia cunzunt il DRG-online ni il «Digitales Wörtermuseum». Sco substitut dal chauredactur actual, Carli Tomaschett, che vegn pensiunà la fin da favrer 2023, enconuscha Ursin Lutz fitg bain tant l’incumbensa quotidiana sco las sfidas dal futur.
Sut la batgetta da la presidenta è vegnì installà ina cumissiun da recrutaziun che consista:
da la presidenta da la Societad Retorumantscha, Corina Casanova, sco era dal vicepresident, Chasper Pult, plinavant dals professers Matthias Grünert, president da la Cumissiun filologica, professer ordinari per rumantsch a l’Universitad da Friburg e Rico Valär, commember da la cumissiun «Dicziunaris naziunals» dall’Academia svizra da scienzias umanas e socialas (ASSU), professer extraordinari per litteratura e cultura rumantscha a l’Universitad da Turitg

Sco novs commembers da la Cumissiun filologica ha la suprastanza elegì Mathias Kundert da Wabern e Carli Tomaschett che surpren quest pensum suenter ch’el ha terminà l’incumbensa da chauredactur. Kundert che ha 43 onns ha fatg il master en historia generala, grec modern e latin ed è tranter auter stà redactur e moderatur da Radiotelevisiun Svizra Rumantscha (RTR). Actualmain lavura el sco analist tar il Secretariat da stadi per la migraziun a Berna. La Cumissiun filologica ha l’incumbensa da survegliar las lavurs da redacziun, dad assister quella cun pled e fatg e da sustegnair scientificamain ils interess da l’ovra. Tar l’elecziun dal chauredactur è quella da consultar da bell’entschatta.

Sin fundament da l’occupaziun interna da la direcziun dal Dicziunari Rumantsch Grischun ha la suprastanza decidì da scriver or ina nova plazza per in(a) collavuratur(a) scientific(a) dal Dicziunari Rumantsch Grischun.